ਹਾਏ ਓ ਰੱਬਾ! ਕਿੱਥੇ ਰਹਿ ਗਈ ਮੇਰੀ ਤਰੱਕੀ ??
ਆਪਣੇ ਤੋਂ ਕਿਧਰੇ ਵੱਧ ਨਾਲਾਇਕਾਂ, ਨਖਿਧਾਂ,
ਅਤੇ ਵਿਹਲਿਆਂ ਦੀ ਚੜ੍ਹਤ ਵੇਖ,
ਮੇਰੀ ਹੈਰਾਨੀ ਦੀ ਹੱਦ ਨਾ ਮੁੱਕੀ।
ਹਾਏ ਓ ਰੱਬਾ! ਕਿੱਥੇ ਰਹਿ ਗਈ ਮੇਰੀ ਤਰੱਕੀ ??
ਡੀ.ਸੀ. ਵਾਲਾ ਪੇਪਰ ਲੈ ਬੈਠਾ ਸਾਨੂੰ ਸਾਡੀ ਜਾਤ ਤੋਂ,
ਸਿਆਸਤ ਲੈ ਬੈਠੀ ਸਾਨੂੰ ਸਾਡੀ ਔਕਾਤ ਤੋਂ,
ਕੰਪਿਊਟਰ ਲੈ ਬੈਠਾ ਆਪਣੀ ਤਕਨੀਕੀ ਕਰਾਮਾਤ ਤੋਂ,
ਇਹ ਸਭ ਕੁਝ ਵੇਖ ਮੇਰੀ ਸਬਰ ਵਾਲੀ ਰੂਹ ਵੀ ਥੱਕੀ।
ਹਾਏ ਓ ਰੱਬਾ! ਕਿੱਥੇ ਰਹਿ ਗਈ ਮੇਰੀ ਤਰੱਕੀ ??
ਕੁਝ ਪਾਉਣ ਲਈ ਕੁਝ ਗੁਆਉਣਾ ਪੈਂਦਾ ਇਹ ਸੁਣਿਆ ਸੀ,
ਪੱਲੇ ਕੱਖ ਨਾ ਰਿਹਾ ਜੋ ਹੁਸਨ, ਜੋਬਨ ਤੇ ਜੁਆਨੀ ਦਾ ਮਾਨ ਸੀ,
ਹਰਮਨ ਸਿੰਘ ਸਡਾਨਾ ਤੇ ਕਈ ਯਾਰਾਂ-ਬੇਲੀਆਂ ਤੇ ਮਸ਼ੂਕਾਂ ਦੀ ਜਾਨ ਸੀ,
ਹੁਣ ਤਾਂ ਇੰਨਾ ਥੱਲੇ ਡਿੱਗਾ ਜਿਵੇਂ ਕਣਕ ਦੇ ਭਾਅ ਜਾਵੇ ਮੱਕੀ।
ਹਾਏ ਓ ਰੱਬਾ! ਕਿੱਥੇ ਰਹਿ ਗਈ ਮੇਰੀ ਤਰੱਕੀ ??
ਅਸਾਂ ਤਾਂ ਕਦੇ ਵੀ ਕਿਸੇ ਦਾ ਕੁਝ ਵਿਗਾੜਿਆ ਨਾ,
ਤਕੜਾ ਤਾਂ ਦੂਰ, ਮਾੜੇ ਦਾ ਵੀ ਕਾਲਜਾ ਸਾੜਿਆ ਨਾ,
ਗੋਲੀ ਤਾਂ ਦੂਰ, ਚਪੇੜ ਯਾਂ ਘਸੁਨ ਵੀ ਮਾਰਿਆ ਨਾ,
ਇਵੇਂ ਜਾਪਦਾ ਕਿਸੇ ਵੈਰਨ ਟੂਣਾ ਕਰਾਕੇ, ਹੋਵੇ ਸਾਡੀ ਕਿਸਮਤ ਡੱਕੀ।
ਹਾਏ ਓ ਰੱਬਾ! ਕਿੱਥੇ ਰਹਿ ਗਈ ਮੇਰੀ ਤਰੱਕੀ ??
ਇਹ ਨਹੀਂ ਕਹਿ ਸਕਦੇ ਕਿ ਜਿਮੇਵਾਰੀਆਂ ਦਾ ਇਹਸਾਸ ਨਹੀਂ,
ਕੋਸ਼ਿਸ਼ਾਂ ਕਰ-ਕਰ ਮੈਂ ਥਾਂ-ਥਾਂ ਖਾਧੀ ਖਾਕ ਨਹੀਂ,
ਇਹ ਵੀ ਨਹੀਂ ਕਹਿ ਸਕਦੇ ਕਿ ਸਾਨੂੰ ਸੰਘਰਸ਼ ਤੋਂ ਮੁਕਤੀ ਦੀ ਆਸ ਨਹੀਂ,
ਬਾਪੂ ਜੀ ਨਾਲ ਵੀ ਮੋਢਾ ਲਵਾਇਆ ਪਰ ਥੋੜੀ ਸੁਭਾਅ ਵਲੋਂ ਨਾ ਬਣ ਸਕੀ।
ਹਾਏ ਓ ਰੱਬਾ! ਕਿੱਥੇ ਰਹਿ ਗਈ ਮੇਰੀ ਤਰੱਕੀ ??
ਮੈਂ ਕਿਹੜਾ ਤੈਥੋਂ ਸਾਰਾ ਜਹਾਨ ਮੰਗ ਲਿਆ,
ਦੌਲਤਾਂ ਤੇ ਸ਼ੌਹਰਤਾਂ ਦਾ ਅਸਮਾਨ ਮੰਗ ਲਿਆ,
ਬਸ ਇਹੋ ਅਰਦਾਸ ਹੈ ਤੇਰੇ ਚਰਣਾਂ ਵਿਚ ਕਿ ਆਪਣੀ ਪਛਾਣ ਹੋਵੇ ਅਤੇ,
ਪਰਿਵਾਰ ਵੱਲ ਤੂੰ ਪਿਆਰ, ਇੱਜ਼ਤ ਤੇ ਹਿਫ਼ਾਜ਼ਤ ਦੀ ਨਿਗਾਹ ਨਾਲ ਤੱਕੀਂ।
ਹਾਏ ਓ ਰੱਬਾ! ਕਿੱਥੇ ਰਹਿ ਗਈ ਮੇਰੀ ਤਰੱਕੀ ??
ਹਾਏ ਓ ਰੱਬਾ! ਕਿੱਥੇ ਰਹਿ ਗਈ ਮੇਰੀ ਤਰੱਕੀ ??
